"Bakı Marafonu 2023"ə yekun vurulub

Heydər Əliyev Fondunun təşəbbüsü ilə artıq 6-cı dəfə təşkil olunan “Bakı Marafonu”nda qaliblərin adına aydınlıq gəlib.

Sağlam həyat tərzini təbliğ etmək məqsədi daşıyan və “Küləyə qalib gəl” şüarı altında keçirilən marafon 21 kilometr məsafəni əhatə edib. Azərbaycan vətəndaşları ilə yanaşı, əcnəbilərin də qatıldığı yarışda ümumən 19 500 nəfər mübarizə aparıb.

Start və finiş nöqtələri Dövlət Bayrağı Meydanında olan marafonda kişilər arasında ukraynalı Boqdan Simonoviç 1-ci yeri tutub. Gürcüstanlı David Karataşvili 2-ci, türkiyəli Arkan Çoban isə 3-cü nəticə göstərib.

Qadınların yarışında da Ukrayna vətəndaşı finişə 1-ci çatıb. İlk yeri tutan Natalya Simonoviçlə yanaşı, onun həmyerlisi Valentina Poltavska 3-cü olub. 2-ci pillədə isə türkiyəli Hasibe Demir qərarlaşıb.

Qeyd edək ki, “Bakı Marafonu 2023”də 1-ci yerin sahibinə 3 000, 2-ci və 3-cü pilləni tutan şəxslərə isə müvafiq olaraq 2 000 və 1 000 manat mükafat təqdim olunub. Bundan başqa, finiş xəttini keçən ilk 2 000 iştirakçıya medallar təqdim edilib.