"Böyük Dəbilqə" turnirində ölkəmizi 33 cüdoçu təmsil edəcək

Bakıda cüdo üzrə “Böyük Dəbilqə” turnirinə start verilib.

Beynəlxalq Cüdo Federasiyasının qərarına əsasən, “Dünya Cüdo Turu” seriyasına daxil olan bu yarış Milli Gimnastika Arenasında keçirilir.

Turnirdə 38 ölkədən 270 cüdoçu medallar uğrunda mübarizə aparacaq. Azərbaycanın yığma komandası isə yarışda 12 çəki dərəcəsində 24-ü kişi və 9-u qadın olmaqla 33 idmançı ilə təmsil olunur.

Qadın cüdoçularımızdan Leyla Əliyeva, Könül Əliyeva, Şəfəq Həmidova, Fidan Qasımova, Fidan Əlizadə, Nərgiz Hacıyeva, Südabə Ağayeva, Günel Həsənli və Nigar Süleymanova medallar uğrunda yarışacaq.

Kişi cüdoçulardan isə Əhməd Yusifov, Murad Muradlı, Turan Bayramov və Balabəy Ağayev, eyni zamanda Rəşid Məmmədəliyev, İbrahim Əliyev, Vüsal Qələndərzadə, Qədir Hüseynov, Yaşar Nəcəfov, Ruslan Paşayev, Rəşad Yelkiyev, Elşən Əsədov, Zelim Tçkayev, Ömər Rəcəbli, Məhərrəm İmamverdiyev, Süleyman Şükürov, Tuncay Şamil, Əli Qazıməmmədov, Əjdər Bağırov, Davud Namazlı, Uşanqi Kokauri, Camal Feyziyev, Kənan Nəsibov və Ramazan Əhmədov ölkəmizi təmsil edəcək.

Qeyd edək ki, yarışda Azərbaycan Cüdo Federasiyasının “A” kateqoriyalı beynəlxalq dərəcəli hakimi Nazim Umbayev ədalət təmsilçiləri arasında yer alıb.