"Liverpul" və "Arsenal" Liqa kubokunda darmadağınla qalib gəliblər

İngiltərə Liqa kubokunda 1/8 finala yüksələn növbəti klublar müəyyənləşib.

Maraqlı oyunlardan biri “Liverpul” və “Vest Hem” arasında olub.

“Enfild” stadionunda keçirilən görüşün 21-ci dəqiqəsində qonaqlar Carell Kuansanın avtoqolu ilə hesabda önə çıxsalar da, mersisaydlılar dönüş edə biliblər. Əvvəlcə 25-ci dəqiqədə tarazlığı bərpa edən Dioqu Jota 2-ci yarının əvvəlində komandasına üstünlük qazandırıb: 2-1.

Qalan vaxtda “qırmızılar”dan Kodi Qakpo dubla imza atıb, daha bir epizodda Məhəmməd Salah fərqlənib. 5-1 hesabı ilə qalib gələn “Liverpul” növbəti mərhələdə “Brayton”a rəqib olub.

Eyni hesab “Arsenal” – “Bolton” matçında da qeydə alınıb. “Emireyts” arenasında baş tutan qarşılaşmada “topçular”ın 17 yaşlı üzvü Etan Nvaneri dubla imza atıb. Digər qollar Deklan Rays, Rahim Sterlinq və Kay Havertsin aktivindədir.

Bu nəticədən sonra 1/8 finala adlayan “Arsenal” aşağı Liqa təmsilçilərindən “Preston”la üz-üzə gələcək.