"Qalatasaray"ın ulduzu üçün 20 milyon avroluq təklif

“Qalatasaray”ın əsas ulduzlarından Barış Alper Yılmaz karyerasını İtaliyada davam etdirə bilər.

Bu barədə Türkiyə mətbuatında xəbərlər paylaşılır.

Bildirilib ki, 24 yaşlı hücumçu "Bolonya"nın əsas transfer hədəfidir. Belə ki, mövsümü 68 xalla 5-ci pillədə başa vuran və Çempionlar Liqasında iştirak hüququ əldə edən kollektiv yeni mövsüm üçün heyətini gücləndirmək qərarına gəlib.

Xüsusən hücum xəttində dəyişiklik etməyi planlaşdıran “Bolonya” Barış Alper üçün “Qalatasaray”a 20 milyon avroluq təklif göndərib. Lakin “sarı-qırmızılar” müqaviləsi 2027-ci ilə qədər olan hücumçunu komandada saxlamaq niyyətindədir.

Qeyd edək ki, Barış Alper Yılmaz 2021-ci ildə “Keçiörəngücü” klubundan “Qalatasaray”a transfer olunub. Bu müddət ərzində 108 matça çıxan Barış 11 qol və 14 məhsuldar ötürmə müəllifi olub. İstedadlı futbolçu həm də “sarı-qırmızılar”la 2 dəfə Türkiyə çempionatında, eləcə də Super Kubokda qələbə qazanıb.

Əlavə edək ki, Alper Yılmaz 2021-ci ildən ölkəsinin millisinə də dəvət olunur. “Ay-ulduzlular”ın heyətində 14 oyunda forma geyinən forvard 1 qolla yadda qalıb.