"Real Madrid" "Atletiko" ilə bacarmadı

25 sentyabr 2023 211 baxış

İspaniya çempionatında 6-cı turun mərkəzi matçında Madridin iki təmsilçisi “Atletiko” və “Real” üz-üzə gəliblər.

“Metropolitano” stadionunda keçirilən görüşdə hesabı artıq 4-cü dəqiqədə meydan sahibləri açıblar. Alvaro Morata Kepa Arrisabalaqanın qoruduğu qapıya yol tapıb. Az sonra fərq 2-yə yüksəlib. Bu dəfə Antuan Qrizman hədəfi dəqiq nişan alıb.

Buraxılan 2-ci topdan sonra təzyiqi artıran “Real” 35-ci dəqiqədə qollardan birinin əvəzini çıxıb. Toni Kroos “los blankos”u ümidləndirib.

İlk hissə “Atletiko”nun 2-1 hesablı üstünlüyü ilə yekunlaşıb. 2-ci yarıya da baş məşqçi Dieqo Simeonenin kollektivi yaxşı başlayıb. 46-cı dəqiqədə Morata özünün 2-ci, komandasının isə 3-cü qolunu vurub. Qalan vaxtda “Real” dönüş etməyə çalışsa da, vəziyyəti dəyişə bilməyib.

Qarşılaşmada 3-1 hesablı qələbə qazanan “Atletiko” xallarının sayını 10-a çatdırıb və 5-ci yerdədir. Mövsümdə ilk dəfə məğlub olan “Real Madrid” isə 15 xalla 3-cü pillədə qərarlaşıb.

#İspaniya çempionatı