“Real Madrid” La liqada 4 qolla məğlub oldu

İspaniya çempionatında 31-ci turun gözlənilməz nəticələrindən biri “Jirona”da qeydə alınıb. Eyniadlı komandanın qonağı olan “Real Madrid” 4 top buraxaraq məğlub olub.

“Munisipal de Montilivi” stadionunda keçirilən görüşdə meydan sahiblərindən Valentin Kastelyanos poker edib. Argentinalının 4 qoluna “kral klubu” Vinisius və Lukasın topları ilə cavab verib. Oyun “Jirona”nın 4-2 hesablı qələbəsi ilə yekunlaşıb.

Bütün turnirlərdə ardıcıl 4 qələbədən sonra uduzan “Real” hazırda 65 xalla 2-ci yerdə qərarlaşıb. 41 xalı olan “Jirona” isə 9-cudur.

Premyer liqada 33-cü turun növbəti qarşılaşmaları baş tutub. Uğursuz mövsüm keçirən “Lids” və “Lester” arasında matç 1-1 hesabı ilə bitib. İlk qolu 20-ci dəqiqədə Luis Sinisterra vurub.

“Tülkülər”in məğlubiyyətdən qurtulmaq cəhdləri görüşün sonlarında nəticə verib. Ceymi Vardi komandasına 1 xal qazandıran topun müəllifi olub. Bu nəticədən sonra 4 oyundur qalib gəlməyən “Lids” 30 xalla 16-cı yerdədir. 1 xal az toplayan “Lester” isə 17-cidir.