Şahmat üzrə "Baku Open-2023" yarışının açılışı olub

Ümummilli lider Heydər Əliyevin anadan olmasının 100 illik yubileyi ilə əlaqədar paytaxtımızda daha bir beynəlxalq turnirə start verilib.

23 ölkədən 600-dək idmançının qatıldığı “Baku Open-2023” şahmat yarışının açılış mərasimində gənclər və idman naziri Fərid Qayıbov, Şahmat Federasiyasının prezidenti Mahir Məmmədov, FIDE-nin rəhbəri Arkadi Dvorkoviç və idman ictimaiyyətinin nümayəndələri iştirak ediblər.

“Bakı Kristal” zalında keçirilən tədbirin əvvəlində çıxış edənlər ölkəmizdə bu idman növünün inkişafına daim dövlət qayğısının olduğunu vurğulayıblar.

Bildirilib ki, ulu öndər Heydər Əliyevin şahmatın inkişafına göstərdiyi diqqət bu gün də Prezident İlham Əliyev tərəfindən davam etdirilir. Daha sonra çıxış edən Beynəlxalq Şahmat Federasiyasının prezidenti Arkadi Dvorkoviç yarışın yüksək səviyyədə təşkil olunduğunu bildirirək, şahmatın inkişafında görülən işlərə görə ölkə rəhbərliyinə təşəkkür edib.

Qeyd edək ki, “Baku Open-2023” yarışının açılış mərasimindən sonra paytaxtımızda keçiriləcək şahmat üzrə Dünya Kuboku ilə bağlı müqavilə imzalanıb.