Titullu sərbəst güləşçimiz Hacı Əliyev idmanla vidalaşdı

Azərbaycan idmanının əfsanələrindən, 3 qat dünya və 4 qat Avropa çempionu olan sərbəst güləşçimiz Hacı Əliyev karyerasını sonlandırıb.

Bu barədə sosial şəbəkə hesablarında paylaşım edən 33 yaşlı pəhləvan ona dəstək olan hər kəsə təşəkkür edib.

Qeyd edək ki, Hacı Əliyev 2014, 2015 və 2017-ci illərdə dünya çempionatında qələbə qazanıb. 2014, 2018, 2019 və 2023-cü illərdə isə təcrübəli güləşçi Avropanın ən güclüsü adına yiyələnib. Dəfələrlə Qran-pri turnirlərində qalib gələn Hacı İslam Həmrəyliyi Oyunlarında 2, Avropa Oyunlarında isə 1 dəfə qızıl medalın sahibi olub.

Bu il Parisdə keçirilən Olimpiadanı mükafatsız başa vuran idmançımız daha əvvəl 2 dəfə dörd illiyin zirvə yarışında medal qazanıb. 2016-cı ildə Rio-de-Janeyroda təşkil olunan turnirdə fəxri kürsünün 3-cü pilləsinə qalxan Hacı “Tokio-2020” Yay Olimpiya Oyunlarında yalnız finalda uduzaraq gümüş medalı aktivinə yazdırıb.