Tofiq Musayev yeni çəki dərəcəsində səhnəyə çıxır

Mütləq Döyüş Çempionatının (UFC) Azərbaycanda keçiriləcək turniri üçün Bakıda səfərdə olan tanınmış MMA idmançıları – Merab Dvalişvili və Belal Məhəmməd azarkeşlərlə görüşüblər.

Tədbir yarışın keçiriləcəyi Bakı Kristal Zalında baş tutub. Gürcüstandan və ABŞ-dən olan döyüşçülər fanatların suallarını cavablandırıblar.

Daha sonra ilk dəfə Azərbaycanda təşkil ediləcək "UFC Baku Fight Night"da oktaqona çıxacaq idmançıların təntənəli çəkiölçmə və üzləşmə mərasimi keçirilib. İştirak edəcək 12 cütlük tamaşaçılar qarşısında üz-üzə gəlib.

Qeyd edək ki, əsas döyüş UFC-nin keçmiş yarımağır çəki çempionu Camal Hill ilə keçmiş titul iddiaçısı Xəlil Rauntri arasında baş tutacaq. Ən vacib ikinci döyüş isə yüngül çəkidə azərbaycanlı döyüşçü Rafael Fiziyev ilə Çilidən olan rəqibi İqnasio Baxamondes arasında keçiriləcək. Oktaqona çıxacaq azərbaycanlı digər döyüşçülər – Nazim Sadıxov braziliyalı Nikola Mottaya, Tofiq Musayev isə qırğızıstanlı Mıktıbek Orolbaya qarşı döyüşəcək.

İlkin kart Bakı vaxtı ilə 20:00-da başlayacaq.