Türkiyə kubokunda qalib müəyyənləşib

Futbol üzrə Türkiyə kubokunda qalib müəyyənləşib.

Finalda “Beşiktaş” və “Trabzonspor” komandaları üz-üzə gəliblər.

“Atatürk Olimpiya Stadionu”nda keçirilən matçda 5 qol vurulub. Hesabı 13-cü dəqiqədə Trabzon klubunun üzvü Pol Onuaçu açıb. Fasilə ərəfəsində “qara qartallar” Raşid Qezzalın qolu ilə tarazlığı bərpa ediblər: 1-1.

2-ci yarının əvvəlində Salih Uçan İstanbul təmsilçisini irəli çıxarıb. Ancaq ruhdan düşməyən “Trabzonspor” 89-cu dəqiqədə bərabərliyi təmin edib. Nikolya Pepe qapını dəqiq nişan alıb. Bununla belə “ağ-qaralar” qələbə topunu vurmağa müvəffəq olublar. Əl Müsratinin qolu “Beşiktaş”a qalibiyyət gətirib.

Beləliklə, finalda 3-2 hesabı ilə qalib gələn İstanbul kollektivi tarixində 11-ci dəfə ölkə kubokunun sahibi olub. “Beşiktaş” bu baxımdan yalnız 18 dəfə mükafata yiyələnən “Qalatasaray”dan geri qalır.

Qeyd edək ki, bu yarışda qələbəyə baxmayaraq, Superliqada “qara qartallar”ın işləri yaxşı getmir. Son tur ərəfəsində 5-ci pillədə olan komanda 4-cü yerdəki “Başakşehir”dən 2 xal geri qalır.