Türkiyə millisi Avstriya səfərində böyük hesabla uduzdu

Milli komandaların AVRO-2024-ə hazırlığı çərçivəsində növbəti yoldaşlıq görüşləri keçirilib.

Vyanada Avstriya kollektivinin qonağı olan Türkiyə yığması böyük hesabla məğlub olub. Meydan sahiblərinin heyətində het-trik edən Mixael Qreqoriçlə yanaşı, Ksaver Şlaqer, Kristof Baumqartner və Maksimilian Entrupun qollarına “ay-ulduzlular” yalnız Hakan Çalhanoğlunun topu ilə cavab veriblər. Avstriya – Türkiyə: 6-1.

Digər oyunda Niderland kollektivini qəbul edən Almaniya yığması 2-1 hesablı qələbə qazanıb. Bundestim matçın 4-cü dəqiqəsində hesabda geriyə düşsə də, az sonra Maksimilian Mittelştadt tarazlığı bərpa edib. 85-ci dəqiqədə isə Niklas Füllkruq Almaniya millisinə qalibiyyəti gətirən qolu vurub.

Londonun “Uembli” arenasında Belçika seçməsini qəbul edən İngiltərə yığması son dəqiqələrdə məğlubiyyətdən xilas olub. İlk hissədə Yuri Tilemansın dubluna Ayvan Touninin topu ilə cavab verən britaniyalılar bərabərlik qolunu əsas vaxta artırılan dəqiqələrdə vurublar. Cud Bellingem İngiltərə millisini məğlubiyyətdən xilas edib. İngiltərə - Belçika: 2-2.