Yunan-Roma güləşi üzrə millimizdən tarixi uğur

Rumıniyada keçirilən Avropa çempionatında daha 2 yunan-Roma güləşçimiz qızıl medal qazanıb.

İdmançılarımızdan Nihat Məmmədli 60, Həsrət Cəfərov isə 67 kq çəkidə fəxri kürsünün ən yüksək pilləsinə qalxıblar.

Təmsilçilərimizdən Nihat Məmmədli finala gedən yolda Bolqarıstan, Danimarka, Litva və Rumıniya, həlledici görüşdə isə Moldova nümayəndəsinə qalib gələrək 1-ci yeri tutub. Həsrət Cəfərov isə ardıcıl olaraq Serbiya, Bolqarıstan, Norveç və Rusiya güləşçilərini məğlub edərək Buxarestdə himnimizi səsləndirməklə yanaşı, karyerasında 2-ci dəfə Avropa çempionu olub.

Bundan başqa, 72 kq-da yer alan Ülvü Qənizadə də qızıl medal uğrunda görüşdə iştirak etsə də, burada Türkiyə idmançısına uduzaraq 2-ci yerlə kifayətlənib.

Bununla da, yarışda 3-ü qızıl, 2️-si gümüş və 1️-i bürünc olmaqla 6 medal qazanan yunan-Roma güləşi üzrə millimiz 1️4️2️ xal toplayaraq komanda hesabında 2-ci yeri tutub. Yığmamız 1-ci pillədə qərarlaşan Türkiyə kollektivindən cəmi 5 xal geri qalıb.