2023-cü ildə əhali üçün hansı yeniliklər olacaq

Qanunvericilikdə edilən dəyişikliklər əsasında gələn ilin dövlət büdcəsinin təsdiqi və müəyyən istiqamətdə ayrılmalar planlaşdırılır. Bu vəsait ayrılmaları bəzi sektorlarda əhalinin gəlirlərində artımlarla nəticələnəcək.

2023-cü ilin ilk ayından etibarən əmək pensiyaları məbləğindən asılı olmayaraq, 15%-ə qədər artırılacaq. Növbəti ildə ilk dəfə olaraq bütün əmək pensiyaçılarının əmək pensiyası indeksasiya olunacaq.

Eyni zamanda, yardımlar əmək pensiyalarının üzərinə əlavə edildikdən sonra pensiya məbləği indeksləşdiriləcək. İşğaldan azad olunan ərazilərimizdə fəaliyyət göstərən sahibkarlara 10 il müddətinə vergi güzəştlərinin edilməsi də nəzərdə tutulub ki, bu da həmin ərazilərdə məskunlaşacaq əhali üçün yeni imkanlar yaradacaq.

Gələn ildən “ƏDV geri al” mexanizmində nəzərdə tutulmuş dəyişiklik də qüvvəyə minəcək. Belə ki, nağdsız ödənişlər zamanı geri qaytarılan hissə 15%-dən 17.5%-ə qədər artırılacaq. Nağd ödənişlər zamanı isə bu göstərici 10%-dən 5%-ə endiriləcək.

Millət vəkili Vüqar Bayramov bildirib ki, gələn il eyni zamanda yaşayış minimumu ilə ehtiyac meyarının məbləğləri eyniləşdiriləcək. Ödəniş bir ailə üçün orta hesabla təxminən 500 manat olacaq.