2025-2026-cı illərdə neft hasilatı ilə bağlı proqnoz açıqlandı

ABŞ Energetika Nazirliyinin Enerji İnformasiya İdarəsinin son proqnozuna görə, 2026-cı ildə Azərbaycanda orta gündəlik neft hasilatı 0,54 milyon barel təşkil edəcək.

Ölkədə xam neft hasilatı üzrə proqnoz əvvəlki qiymətləndirmə ilə müqayisədə dəyişməz qalıb.

Proqnoza görə, 2026-cı ildə hasilatın birinci rübdə sutkada 0,55 milyon barel səviyyəsində başlaması, ikinci rübdə 0,54 milyon, üçüncü və dördüncü rüblərdə isə 0,53 milyon barelə enəcəyi gözlənilir.

2025-ci il üçün Enerji İnformasiya İdarəsi orta gündəlik hasilatı 0,57 milyon barel nəzərdə tutaraq proqnozunu dəyişməz saxlayıb. Birinci və ikinci rüblərdə bu göstərici sutkada 0,57 milyon barel, ilin ikinci yarısında isə cüzi azalma ilə sutkada 0,56 milyon barel səviyyəsində proqnozlaşdırır.

2024-cü ilin yanvar-iyun ayları üzrə əməliyyat məlumatlarına əsasən, neft hasilatının ümumi həcmi kondensat da daxil olmaqla 13,7 milyon ton təşkil edib. Bunlardan 8 milyon tonu “Azəri-Çıraq-Günəşli” yatağının, 1,9 milyon tonu “Şahdəniz”in, 0,3 milyon tonu isə “Abşeron”un payına düşüb. SOCAR-ın hasilatı kondensat da daxil olmaqla 3,5 milyon ton təşkil edib.