Abşeron və Ağdaşda strateji layihə | Enerji təhlükəsizliyini gücləndirən yeni sistem - Baku TV

Azərbaycanda bərpa olunan enerji mənbələrinin dinamik inkişafı üçün “AzərEnerji” tərəfindən genişmiqyaslı Batareya Enerji Saxlanc Sistemlərinin yaradılması prosesi sürətli şəkildə davam edir.

Bütünlükdə MDB məkanında gücünə və tutumuna görə ən böyük Batareya Saxlanc Sistemləri olan bu enerji obyektləri paytaxta yaxın 500 kilovoltluq “Abşeron”, eləcə də ölkənin mərkəz hissəsində yerləşən 220 kilovoltluq “Ağdaş” yarımstansiyalarının ərazilərində qurulur.

Ümumi gücü 250 meqavat, enerji tutumu isə 500 meqavat-saat olan mərkəzlər üçün Batareya Saxlanc Sistemlərinin ilk partiyası artıq bu günlərdə ölkəyə gətirilib. Avadanlıqlar Çinin “Great Power” zavodunda sifariş əsasında yığılıb. Artıq saxlanc sistemlərinin 15 faizi ölkəyə gətirilib və qalan 85 faizi isə aprel ayına qədər gətirilərək quraşdırılacaq.

Qeyd edək ki, “AzərEnerji” tərəfindən Batareya Saxlanc Mərkəzlərinin yaradılması enerji sisteminin dayanıqlığının artırılması, tezliyin sabit saxlanılması, bərpa olunan enerji mənbələrində dəyişkənliyin balanslaşdırılması, pik yüklərin ödənilməsi, günəş enerjisinin azalması saatlarında yük qrafikinin hamarlanması və qəza hallarında enerji sisteminin sıfırdan bərpası baxımından strateji əhəmiyyət daşıyır.

Bu sistemlər Azərbaycanın enerji müstəqilliyini gücləndirməklə yanaşı, enerji şəbəkəmizin həm qonşu ölkələrlə paralel, həm də müstəqil rejimdə etibarlı fəaliyyətini təmin edəcək.