Azərbaycanda neft və qazla bağlı proqnoz | 2025-ci ildə...

Azərbaycanda neft hasilatı 2025-ci ildə gündəlik 576 min barel, 2026-cı ildə isə 571 min barel səviyyəsində proqnozlaşdırılır.

Bu barədə "Fitch Ratings" beynəlxalq reytinq agentliyinin hesabatında qeyd edilib.

Agentliyin qiymətləndirməsinə görə, Azərbaycan hökuməti əsas prioritetlərdən biri kimi Azəri–Çıraq–Günəşli yatağında hasilatın sabitləşdirilməsinə üstünlük verir. Yaxın perspektivdə bu yataqdan gündəlik təxminən 340 min barel neft hasil olunacağı gözlənilir.

Təbii qazla bağlı proqnozlara gəldikdə isə "Fitch Ratings" hesab edir ki, 2025-ci ildə Azərbaycanda qaz hasilatı 50,3 milyard kubmetrə çatacaq.

Rəsmi statistikaya əsasən, 2025-ci ilin yanvar-may aylarında Azərbaycanda ümumilikdə 20 milyard 910,8 milyon kubmetr təbii qaz hasil edilib. Bunun 16 milyard 192,8 milyon kubmetri əmtəəlik qaz olub.

Eyni dövrdə qaz kondensatı da daxil olmaqla neft hasilatı 11 milyon 438,3 min ton təşkil edib ki, bunun da 11 milyon 411,4 min tonu əmtəəlik neftin payına düşür.

Qeyd edək ki, Azəri–Çıraq–Günəşlidə BP 30,37%, SOCAR 31,65% pay sahibidir.