Azərbaycandan göndərilən məhsullar Rusiya sərhədində niyə saxlanılıb?

“Rusiyaya göndərilən Azərbaycan mallarına Azərbaycan fitosanitariya xidməti müsbət rəy versə də, Rusiya bu malları geri qaytarıb”.

Bunu Milli Məclisin Əmək və sosial siyasət komitəsinin sədri Musa Quliyev parlamentin oktyabrın 29-da keçirilən plenar iclasında “Azərbaycan Respublikası Hökuməti ilə Rusiya Federasiyası Hökuməti arasında bitki karantini və mühafizəsi sahəsində əməkdaşlıq haqqında Saziş”in təsdiq edilməsi layihəsinin müzakirəsi zamanı deyib.

Deputat bildirib ki, bu hallar daha əvvəl də olub:

“Bu zaman sahibkara ziyan dəyir. Kənd təsərrüfatı məhsulları daha çox Azərbaycandan Rusiyaya gedir. Rusiyadan əsasən taxıl, kartof gəlir. Amma yaş məhsullar daha çox bizdən gedir. Azərbaycan malları dəfələrlə sərhəddə qalıb, gözlədilib. Belə hadisələrdə ən çox əziyyət çəkən sahibkarlar olur. Hətta bəzi hallarda bu kimi məqamlar iki ölkə arasında münasibətlərə də təsir edə bilir. Əgər iki ölkənin qurumu arasında bu cür fikir ayrılığı yaranırsa, məsələ necə həll ediləcək?”.