Azərbaycandan "çirkli pul" çıxarmaq istəyənlərə zərbə

Xarici ölkədə pul çıxaran zaman ayda 10 min dollarlıq limitin qoyulması ciddi rezonans yaradıb.

Ancaq ekspertlər bunun əbəs olduğunu bildiriblər. Ona görə ki, bu qayda 30 min, 40 min və ya 100 min dollar çıxarmaq istəyənlərə mane ola bilməz.

Çünki bu məbləği 5-10 nəfər və ya 5-10 kart vasitəsilə xaricə daşımaq, pulu kartdan çıxarmaq mümkündür. Amma 10 milyon və ya 100 milyon dolları ölkədən kartla çıxarmaq üçün 10 000 nəfər adam və ya 10 000 ədəd kart tapmaq mümkün deyil. Odur ki, bu yeni qərar böyük əhali kütləsini təsirləndirməyəcək. Bu qərar ölkədən külli miqdarda çirkli pul çıxarmağa çalışanların qarşısını alacaq.

Əslində, siravi vətəndaşlar üçün yeni qaydalarda sərfəli cəhətlər mövcuddur. Belə ki, fiziki şəxslərin şəxsi məqsədlər üçün ölkə xaricinə köçürdükləri məbləğlər üzrə gündəlik limitlər ləğv edilərək aylıq limitlə əvəzlənib. Yəni ayda 20 min dollaradək ödəniş həyata keçirmək mümkün olacaq. Bu isə əvvəlki məhdudiyyətlərlə yaranmış problemlərin həllinə vəsilə olacaq. Çünki insanlar müxtəlif məqsədlər üçün bir dəfəyə ödəməli və həll etməli olduğu işini edə bilmir, günlərlə əziyyət çəkirdi. Odur ki, bunu daha effektiv dəyişiklik hesab etmək olar.

O ki qaldı mənzil, maşın və digər əmlak almaq istəyənlərə, bu məsələdə problem yoxdur. Bu proseslər başqa qaydalarla tənzimlənir.