Bakıda 1-ci Azərbaycan Beynəlxalq İnvestisiya Forumu | Nələr müzakirə ediləcək?

Bakıda Azərbaycan Prezidenti İlham Əliyevin himayəsi altında Birinci Azərbaycan Beynəlxalq İnvestisiya Forumu keçirilir. Dövlət başçısı Forum iştirakçılarına müraciət ünvanlayıb.

Müraciəti Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov oxuyub.

Müraciətdə Prezident İlham Əliyev Azərbaycanda ilk dəfə keçirilən bu Forumun qarşılıqlı, faydalı əməkdaşlığın dərinləşdirilməsi, yeni tərəfdaşlıq əlaqələrinin qurulması, qabaqcıl ideyaların və layihələrin müzakirəsi, ölkəyə yeni investisiyaların cəlb olunması üçün mühüm platforma olacağına inamını ifadə edib.

Ölkə başçısı qeyd edib ki, Azərbaycanda həyata keçirilən sosial-iqtisadi islahatlar və qlobal iqtisadiyyata inteqrasiya aparıcı beynəlxalq şirkətlər üçün ölkəmizdə geniş və əlverişli imkanlar yaradıb. Məhz bu səbəbdən 2004-2024-cü illər ərzində iqtisadiyyatımıza 344,4 milyard ABŞ dolları həcmində sərmayə qoyulmuş, bunun əhəmiyyətli hissəsi və ya 213,2 milyard ABŞ dolları qeyri-neft sektorunun inkişafına yönəlib.

Orta Dəhlizin əhəmiyyətinə toxunan dövlət başçısı gələcək illərdə, xüsusilə də Zəngəzur koridorunun işə düşməsi ilə tranzit yük daşımalarının həcminin ildən-ilə artmasının gözlənildiyini bildirib. Ölkədə yaradılan müasir infrastruktur, o cümlədən Bakı Beynəlxalq Dəniz Ticarət Limanı, Ələt Azad İqtisadi Zonası və müasir dəmir yolu infrastrukturu sərmayədarlara qlobal bazarlara birbaşa çıxış və yüksək tranzit səmərəliliyi təklif edir.

Bildirək ki, Birinci Azərbaycan Beynəlxalq İnvestisiya Forumunun davam edəcəyi 2 gün ərzində nüfuzlu sahibkarlar, aparıcı beynəlxalq şirkətlərin və qurumların nümayəndələri bir araya gələrək yeni tərəfdaşlıq imkanlarını müzakirə edəcəklər.