BP rəsmisi azad olunan ərazilərdə gördükləri işlərdən danışdı - Baku TV

Cəbrayılda “Şəfəq” Günəş Elektrik Stansiyasını (GES) inşa etmək üçün lazım olan panellərin 20%-i rayon ərazisindədir.

Bu barədə BP-nin Xəzər regionu üzrə vitse-prezidenti Bəxtiyar Aslanbəyli Bakıda keçirilən “Gömrük-Biznes Forumu 2025: Dialoq və Etimad” tədbirində məlumat verib.

Onun sözlərinə görə, yaxın zamanda stansiyanın tikintisinə başlanacaq:

“Şəfəq” layihəsi bizim üçün tamamilə yeni bir istiqamətdir. Bu sahədə əvvəllər fəaliyyətimiz olmayıb. İdxal-ixrac proseslərində gömrük orqanları ilə sıx əməkdaşlıq sayəsində panellərin təxminən 20%-i artıq Cəbrayıl rayonuna gətirilib”.

BP rəsmisi bildirib ki, şirkət ölkədə fəaliyyət göstərdiyi müddətdə hər zaman yüksək standartların tətbiqinə və yerli potensialın inkişafına çalışıb.

O qeyd edib ki, layihələrin uğurla həyata keçirilməsində Azərbaycan hökumətinin və xüsusilə fiskal strukturların dəstəyi mühüm rol oynayıb.