Əli Əsədovdan inflyasiya ilə bağlı vacib sərəncam

Azərbaycanda inflyasiya və qiymətlər üzrə monitorinqin gücləndirilməsi üçün İşçi qrup yaradılıb. Bu barədə Baş nazir Əli Əsədov sərəncam imzalayıb.

Məqsəd Azərbaycanda inflyasiyaya təsir göstərən amillərin müəyyən olunması, iqtisadi artım üçün məqbul səviyyəyə endirilməsinin təmini, inflyasiya proseslərini və onun səbəblərini kəmiyyət və keyfiyyətcə qiymətləndirməyə imkan verən təhlil və monitorinq sisteminin daha da təkmilləşdirilməsi, eləcə də bu sahədə qurumlararası koordinasiyanın gücləndirilməsidir.

İşçi qrupun sədri Nazirlər Kabineti Aparatının rəhbəridir. Sənədə əsasən, aidiyyəti dövlət qurumları İşçi qrupda təmsil olunacaq nümayəndələri barədə təkliflərini 5 gün müddətində Nazirlər Kabinetinə təqdim etməlidirlər.

İşçi qrupuna tapşırılıb ki, ölkədə inflyasiya proseslərinin təhlili üzrə işlərin daha da gücləndirilməsi və qiymət monitorinqinin təkmilləşdirilməsi istiqamətində tədbirlər görüb, ayda bir dəfə nəticəsi barədə Nazirlər Kabinetinə hesabat versinlər.