Moldova SOCAR-la danışıqlar apardı | Vladimir Bolyadan açıqlama

Moldova Azərbaycan Dövlət Neft Şirkəti ilə gübrə alışı barədə danışıqlar aparır.

Bu barədə “Report”a müsahibəsində Moldovanın Baş nazirinin müavini, infrastruktur və regional inkişaf naziri Vladimir Bolya bildirib.

“Enerji və aqrar-sənaye sahələrində əməkdaşlıq çərçivəsində SOCAR-ın istehsal etdiyi mineral gübrələrin alınması məsələsi nəzərdən keçirilir. Şirkətin Rumıniyada logistika bazası var və tədarük məhz bu ərazidən təşkil olunacaq ki, bu da mövcud infrastruktura inteqrasiyanı asanlaşdırır”, – deyə nazir əlavə edib.

Onun sözlərinə görə, Moldova enerji təhlükəsizliyinin gücləndirilməsi və enerji təchizatı mənbələrinin şaxələndirilməsi strategiyası çərçivəsində təbii qazın tədarükü haqqında uzunmüddətli çoxillik müqavilənin bağlanması ilə bağlı fəal danışıqlar aparır. Xüsusilə ölkə SOCAR ilə qaz idxalı imkanını müzakirə edir.

“Moldovada bioqaz istehsalı üçün səmərəli şəkildə istifadə edilə bilən böyük miqdarda biokütlə var. Biz bu sahəyə investisiyaların və qabaqcıl texnologiyaların cəlb edilməsində maraqlıyıq. Görüşlər zamanı bu istiqamətdə mümkün birgə layihələr çərçivəsində tam anlayış və dəstək nümayiş etdirildi”, – deyə Vladimir Bolya qeyd edib.