Özbəkistanda hansı işlər görüləcək? | SOCAR-ın layihəsinin detalları məlum oldu

SOCAR 2026-cı ilin birinci rübündə Özbəkistanın Üstyurd regionunun investisiya bloklarında geoloji kəşfiyyat işlərinə başlamağı planlaşdırır.

Bunu “Report”a müsahibəsində “Özbəkneftqaz” Səhmdar Cəmiyyətinin İdarə Heyətinin sədri Bahodirjon Sidikov deyib.

O bildirib ki, işlər təşkilati-hazırlıq mərhələsi başa çatdıqdan və bütün lazımi icazələr alındıqdan sonra mümkün olacaq. Sənaye ehtiyatları təsdiq olunarsa, layihə sınaq istehsalından və hasilat texnologiyalarının sınağından keçəcək.

İdarə Heyətinin sədri vurğulayıb ki, geoloji kəşfiyyat mərhələsində layihənin operatoru SOCAR olacaq.

Gələcəkdə operatorluğun ötürülməsi mümkünlüyü məsələsinə gəlincə isə o qeyd edib ki, buna əldə edilmiş nəticələr və tərəflərin strateji hədəfləri əsasında baxılacaq.

Sədrin sözlərinə görə, ilkin mərhələdə maliyyələşdirmə investorlar tərəfindən öhdəliklərin tərəflər arasında bərabər bölüşdürülməsi ilə həyata keçirilir. Lazım gələrsə, xarici maliyyə cəlb edilə bilər.