Prezident İlham Əliyev Azərbaycanın iqtisadi sahədəki uğurlarından danışdı

“Biz ən başdan, müstəqilliyimiz bərpa ediləndən bəri olduğumuz yerdəyik”.

Bu sözləri Azərbaycan Prezidenti İlham Əliyev yanvarın 20-də Davosda Çinin “China Global Television Network” telekanalına müsahibəsində deyib.

“Biz özünü təmin edən iqtisadiyyat qurduq. Ümumi daxili məhsula nisbətdə xarici borcun səviyyəsi çox aşağıdır, cəmi 6,9 faizdir. Buna əsaslanaraq biz regionda bağlantılar yaradan genişmiqyaslı layihələr həyata keçirmişik və aid olduğumuz Cənubi Qafqaz və Xəzər regionunda etibarlı mövqe tutmuşuq, eyni zamanda milli maraqlarımızı, həyat tərzimizi və müstəqil siyasətimizi qəti şəkildə müdafiə etmişik və çoxlu uğur qazanmışıq. Məncə, dünya xəritəsində nisbətən yeni olan Azərbaycanın öz milli maraqlarını müdafiə edən və bütün dünyada yaxşı əlaqələr quran ölkə kimi nümunəsi onu göstərir ki, cəmiyyətdə sabitlik, birlik varsa, siz öz maraqlarınızı müdafiə edə bilərsiniz”, – dövlət başçısı qeyd edib.