Prezident “Qaz təchizatı haqqında” qanunla bağlı fərman imzaladı

SOCAR-ın tabeliyində yeni hüquqi şəxslər yaradılacaq.

Bu barədə Prezident İlham Əliyevin avqustun 19-da imzaladığı “Qaz təchizatı haqqında” qanunun tətbiqi, bununla əlaqədar bəzi məsələlərin tənzimlənməsi barədə Fərmanda öz əksini tapıb.

Sənədə əsasən, Dövlət Neft Şirkəti qanuna uyğun olaraq, qazın nəqlini, paylanmasını, saxlanmasını, topdan satışını və idxalını, habelə pərakəndə satışını həyata keçirmək məqsədilə 2027-ci il yanvarın 1-nə qədər tabeliyində ayrı-ayrı hüquqi şəxslərin yaradılmasını, həmin hüquqi şəxslərdə mütərəqqi korporativ idarəetmə prinsiplərinin tətbiqini, o cümlədən onların müşahidə şuralarının yaradılmasını təmin edib dövlət başçısına məlumat verməlidir.

Sözügedən Fərmanda həmçinin Nazirlər Kabinetinə, Energetika Nazirliyinə və Fövqəladə Hallar Nazirliyinə müvafiq tapşırıqlar verilib.