Qarabağ və Şərqi Zəngəzurda yeni dövr | "AzerGold"un İdarə Heyətinin sədrindən açıqlama - Baku TV

Azərbaycanın dağ-mədən sənayesinin inkişafı uzun illər ərzində həm obyektiv, həm də subyektiv amillərlə məhdudlaşdırılıb. Sovet dövründə aşkar edilmiş strateji metal yataqlarının əhəmiyyətli hissəsi sonradan işğal altında qalıb və həmin yataqların bir qismi Ermənistan tərəfindən qanunsuz hasil edilərək talanıb.

Bunu "AzerGold" QSC-nin İdarə Heyətinin sədri Zakir İbrahimov sentyabrın 24-də keçirilən mətbuat konfransında deyib.

Onun sözlərinə görə, Dövlət Proqramının icrası ilə xüsusilə işğaldan azad edilmiş ərazilərdə dağ-mədən sənayesində yeni mərhələ başlayıb. Qarabağ və Şərqi Zəngəzurda yerləşən qiymətli və əlvan metal yataqlarının istismara cəlb edilməsi Dövlət Proqramının əsas prioritetlərindəndir.

Z.İbrahimov bildirib ki, Ağdərə rayonunun Canyataq kəndi ərazisində yerləşən “Dəmirli” mis yatağında istismar işlərinə artıq başlanılıb. Kəlbəcər rayonunda “Zod” yatağında isə hasilatın başlanması üçün hazırlıq işləri aparılır.

Onun sözlərinə görə, Zəngilan rayonunda mövcud ehtiyatların müasir geoloji üsullarla yenidən qiymətləndirilməsi, resurs bazasının dəqiqləşdirilməsi, gələcək hasilat üçün zəruri tədbirlərin görülməsi və müvafiq infrastrukturun yaradılması istiqamətində işlər davam etdirilir.