"Bakı-Sian" blok qatarının yola salınma mərasimi

Azərbaycan-Çin ticarət əlaqələri tarixində ilk dəfə olaraq ixrac yükləri Bakıdan dəmir yolu nəqliyyatı ilə Çinə yola salınıb.

İlk ixrac qatarının yola salınma mərasimində Azərbaycan və Qazaxıstan dəmir yollarının yüksək nümayəndə heyəti, Transxəzər Beynəlxalq Nəqliyyat Marşrutu katibliyinin rəhbərliyi ilə yanaşı, Çinin Sian Çanba Beynəlxalq Limanının İdarəetmə Komitəsinin rəhbər şəxsləri də iştirak ediblər.

“Burada Sian şəhərindən Abşerona qədər uzanan yolun necə qısaldığını görə bilərik. Azərbaycanın müttəfiqlik dəstəyi bu mövzuda olduqca vacibdir. Bakı çox gözəl şəhərdir və vacib dəhlizdir. Bu dəhlizin mövcudluğu bizə daha çox qazanc əldə etməyə imkan yaradır”, – deyə Çinin Sian Çanba Beynəlxalq Limanının İdarəetmə Komitəsinin baş katibi Sum Yimin bildirib.

Qeyd edək ki, yola salınmış “Bakı-Sian” ilk ixrac blok qatarı 62 ədəd 40 futluq konteynerdən ibarətdir. Bu yük multimodal olaraq Qazaxıstan üzərindən Çinin ən böyük quru limanlarından biri olan Sian Limanına çatdırılacaq. Layihə çərçivəsində ilkin olaraq bu ilin sonunadək ümumilikdə 15 min ton, yəni 600 konteyner ixrac yükünün qeyd olunan marşrut ilə Çinə göndərilməsi planlaşdırılır.