"Muğan Bank" bağlandı: Mərkəzi Bankdan açıqlama

“Muğan Bank”ın lisenziyası ləğv edilib.

Mərkəzi Bankın İdarə Heyətinin 18 oktyabr 2023-cü il tarixli qərarı ilə məcmu kapitalının miqdarının banklar üçün müəyyən edilən minimum miqdarından az olduğuna, məcmu kapitalının adekvatlıq əmsalının 3 faizdən az olmasına, cari fəaliyyətini etibarlı və prudensial qaydada həyata keçirmədiyinə, habelə bankın daxili idarəetmə və nəzarət prosedurları adekvat olmadığına görə “Banklar haqqında” müvafiq maddələrə əsasən, “Muğan Bank” ASC-nin lisenziyası oktyabrın 19-dan ləğv edilib.

Banka müvəqqəti inzibatçı təyin edilib və bankın müflisləşmə yolu ilə ləğv edilməsi barədə məhkəməyə müraciət olunub. Mərkəzi Bankın İdarə Heyətinin qərarı ilə “Muğan Bank”a müvəqqəti inzibatçının təyin olunması ilə əlaqədar bankın idarә olunması üzrә bütün sәlahiyyәtlәr, o cümlәdәn bank sәhmdarlarının ümumi yığıncağının sәlahiyyәtlәri müvәqqәti inzibatçıya keçib.

“Muğan Bank”ın ölkənin bank sisteminin aktivlərində xüsusi çəkisi 1,4%, kredit portfelində 2%, sektorun öhdəliklərində isə cəmi 1,3% təşkil edir. “Muğan Bank”ın bank lisenziyasının ləğvi bu sahədə maliyyə dayanıqlığı və maliyyə sabitliyinə heç bir təhdid yaratmır.

Mərkəzi Bank bildirir ki, “Muğan Bank” Əmanətlərin Sığortalanması Fonduna üzv bankdır və əhalinin bu bankda sığortalanmış əmanətləri üzrə kompensasiyalar qanunvericiliyə müvafiq qaydada ödəniləcək.

“Muğan Bank”ın digər öhdəlikləri məhkəmə tərəfindən təyin olunacaq ləğvedici qanunvericiliyə müvafiq qaydada tənzimlənəcək. Bankın Fonda təqdim etdiyi hesabatlarına əsasən, 2023-cü ilin III rübünün sonuna bank üzrə sığortalanmış əmanətlər 216,7 mln. manat təşkil edir.

Qeyd edək ki, bankın əmanətçilərinin say etibarı ilə 99,9%-nin əmanətləri kompensasiya olunacaq.