Problemli kreditlərin artması nə ilə bağlıdır? | Ekspertlərdən açıqlama - Baku TV

Azərbaycanda problemli kreditlərin məbləği artıb.

Mərkəzi Bankın məlumatına görə, 2026-cı il avqustun 1-nə Azərbaycanda vaxtı keçmiş kreditlərin məbləği 723 milyon manat təşkil edib. Bu göstərici iyulun 1-i ilə müqayisədə 0,5 %, ilin əvvəlinə nisbətən 37,85 %, son bir ildə isə 36,6 % artıb.

İqtisadçı Rəşad Həsənov vəziyyəti bir sıra amillərlə, o cümlədən Mərkəzi Bankın atdığı addımlarla əlaqələndirir.

“Xüsusilə də aşağı xərcli vəsaitlərin bank sektorunda azalması və bank faizlərinin artması ilə bağlı bir situasiya formalaşıb. Faizlərin artması isə dolayısı ilə borc yükünü artırır və borcların riskini yüksəldən əsas amillərdən biri kimi ortaya çıxır. Digər məsələ borclanmanın sürətinin artmasıdır. Adambaşına düşən borc səviyyəsi 2025-ci ildə 19 %-ə qədər yüksəlib ki, bu da kifayət qədər yüksək göstəricidir. Belə olduğu təqdirdə əhalinin gəlirlərinin artım tempi ilə borclanmanın artım tempi arasında disbalans yaranır və borcun geri qaytarılması imkanları məhdudlaşır”, – deyə iqtisadçı bildirib.