SOCAR istiqrazları sahiblərinə nə qədər gəlir gətirdi? - Rəqəmlər açıqlandı

Azərbaycan Dövlət Neft Şirkətinin 2021-ci ildə daxili kapital bazarları üçün buraxdığı ikinci SOCAR İstiqrazlarının 2025-ci il üzrə 1 milyon 125 min dollarlıq ilk kupon ödənişi fevralın 3-də istiqraz sahiblərinin hesablarına köçürülüb.

“SOCAR Capital” şirkətinin məlumatına görə, 8 ildən artıqdır ki, Bakı Fond Birjasında ən çox ticarət olunan korporativ istiqraz statusuna sahib SOCAR İstiqrazlarının 13-cü kupon ödənişi nəticəsində sahiblərinə qazandırdığı gəlir 14 milyon 625 min ABŞ dollarına yüksəlib.

Tədavül müddətinin sonunda toplam gəlir 22,5 milyon dollar təşkil edəcək. İstiqrazların növbəti kupon ödənişi 2025-ci ilin mayın 1-də baş tutacaq.

Xatırladaq ki, yanvarın 15-dən etibarən SOCAR “yaşıl enerji” layihələrini dəstəkləmək məqsədilə “yaşıl” təyinatlı yeni istiqrazlarının abunə yazılışına start verib.

“Yaşıl istiqraz”ların anderrayterliyini “PAŞA Kapital” İnvestisiya Şirkəti edir. SOCAR “Yaşıl Gəlir, Yaşıl Gələcək” devizi altında buraxdığı bu istiqrazları ilə yerli investorlara etibarlı və stabil gəlir imkanı qazandırmaqla yanaşı, ekoloji cəhətdən təmiz enerji mənbələrinin inkişafını dəstəkləmək, ölkəmizin “yaşıl enerji” sahəsindəki təşəbbüslərinə töhfə vermək niyyətindədir.