SOCAR rəsmisi “Enerji Liderləri” panelində iştirak edib - Baku TV

SOCAR-ın vitse-prezidentinin müavini Vitaliy Bəylərbəyov mayın 7-də Macarıstanda keçirilən 7-ci Budapeşt LNG Sammitində “Enerji Liderləri” panelində iştirak edib.

Vitaliy Bəylərbəyov çıxışında qlobal enerji təhlükəsizliyinin gücləndirilməsi, təbii qaz mənbələrinin və marşrutlarının şaxələndirilməsi, eləcə də Cənub Qaz Dəhlizinin strateji əhəmiyyətindən danışıb.

O, Azərbaycanın son 30 ildə təbii qaz idxalçısından etibarlı enerji təchizatçısına çevrildiyini, hazırda 16 ölkəyə, o cümlədən Avropa İttifaqına üzv olan 10 ölkəyə təbii qaz ixrac etdiyini vurğulayıb.

Panel müzakirələrində həmçinin yeni qaz həcmlərinin bazarlara çıxarılmasında beynəlxalq maliyyə institutlarının dəstəyi və bu istiqamətdə investisiyaların davam etdirilməsinin vacibliyi vurğulanıb.

Qeyd edək ki, sözügedən sammit regional tələbatı beynəlxalq təchizat zənciri ilə birləşdirməyi, regional və qlobal LNG bazarlarının əsas maraqlı tərəflərini bir araya gətirməyi hədəfləyir.