SOCAR və "Tatneft" arasında vacib əməkdaşlıq

Rusiyanın “Tatneft” Publik Səhmdar Cəmiyyəti Azərbaycan Dövlət Neft Şirkəti ilə birlikdə 19-cu əsrin sonlarında kəşf edilmiş “Bibiheybət” yatağının işlənməsini həyata keçirəcək.

Bu barədə Rusiyanın Tatarıstan Respublikasının “Tatneft” PSC-nin baş direktoru Nail Maqanov məlumat verib.

“Bu, qədim yataqlardan biridir. Biz SOCAR-dakı həmkarlarımızla birlikdə əlimizdə olan texnologiyaları istifadə edəcəyik”, – deyə Nail Maqanov vurğulayıb.

O əlavə edib ki, Tatarıstan və Azərbaycan şirkətləri Türkiyədə neft emalı zavodunun yenidən qurulması ilə bağlı da fəaliyyət göstərirlər:

“Biz ənənəvi olaraq neft-kimya sahəsində yaxşı nəticələr əldə etmişik və azərbaycanlı həmkarlarımızla birlikdə bu mövzu üzərində işləyirik. Bundan əlavə, biz digər ölkələrdə də fəaliyyət göstəririk”, – “Tatneft”in rəhbəri deyib.

Qeyd edək ki, 2024-cü ilin mayında Azərbaycan Dövlət Neft Şirkəti və Rusiyanın “Tatneft” PSC arasında əməkdaşlığa dair Yol Xəritəsi imzalanıb.