Yarmarkalarda məhsulların keyfiyyətinə nəzarət olunur

“Hər il Kənd Təsərrüfatı Nazirliyi tərəfindən təşkil olunan Arıçılıq Məhsullarının Ənənəvi Respublika Sərgi-Satış Yarmarkaları çərçivəsində satışa çıxarılan bütün məhsullar risk əsaslı yoxlamalara cəlb olunur”.

Bunu Azərbaycan Qida Təhlükəsizliyi Agentliyinin (AQTA) sədri Qoşqar Təhməzli Aqrar Biznes festivallarına həsr olunmuş yekun tədbirdə çıxış edərkən deyib.

O bildirib ki, Azərbaycan Qida Təhlükəsizliyi İnstitutunun mütəxəssisləri tərəfindən bal və digər arıçılıq məhsullarından nümunələr götürülərək laborator müayinələr aparılır, qida təhlükəsizliyi və keyfiyyət standartlarına cavab verməyən məhsulların satışına yol verilmir.

Qoşqar Təhməzli vurğulayıb ki, Bakı şəhərində keçirilən mövsümi yarmarkalarda da məhsulların keyfiyyətinə operativ nəzarət təmin edilir:

“Yarmarkalarda fəaliyyət göstərən Səyyar Qida Laboratoriyaları vasitəsilə vətəndaşların satışa çıxarılan məhsulların təhlükəsizliyi və keyfiyyəti ilə bağlı müraciətləri yerində araşdırılır, zərurət yarandıqda isə məhsullardan laborator analizlər üçün nümunələr götürülür. Bu yanaşma istehlakçıların etimadının artırılmasına və əhalinin təhlükəsiz, keyfiyyətli qida məhsulları ilə təmin olunmasına xidmət edir”.