Baku TV-nin filmləri “Qızıl Pəri 2025” mükafatına bir neçə nominasiya üzrə təqdim olunub

Azərbaycanın aparıcı media qurumlarından biri olan Baku TV-nin istehsal etdiyi filmlər, bu il ölkəmizin ən nüfuzlu audiovizual mükafatlarından biri – “Qızıl Pəri 2025” mükafatına bir neçə nominasiya üzrə təqdim olunub.

“Qızıl Pəri” Peşə Mükafatı ölkəmizin film və televiziya sənayesində yaradıcı peşəkarlığın ən yüksək göstəricilərindən biri hesab olunur. Mükafat Azərbaycan Kino Akademiyası, Azərbaycan Professional Kinorejissorlar Gildiyası, Azərbaycan Aktyorlar Gildiyası və Azərbaycan Prodüserlər Gildiyasının dəstəyi ilə təşkil edilir. Bu nüfuzlu tədbir, ekran sənətinə dəyərli töhfələr verən yaradıcı komanda və layihələri tanıtmaq, onların fəaliyyətini təşviq etmək məqsədi daşıyır.

Builki müsabiqəyə ümumilikdə 420 film təqdim edilib. Onların arasında Baku TV-nin rejissorları İman Məcidov və Mətləb Muxtarovun ərsəyə gətirdiyi filmlər də müxtəlif nominasiyalar üzrə yer alıb. Nominantlar sırasına “Biz sizi heç unutmadıq” (Ən yaxşı sosial reklam çarxı), “Ocaqov dünyası” (Ən yaxşı kino haqqında kino), “Milyonçu” (Ən yaxşı film portret), “Odla yoğrulmuşlar” (Ən yaxşı qısametrajlı sənədli TV film) və “Qırlı Bakı” (Ən yaxşı qısametrajlı sənədli TV film) fimləri daxildir.

“Qızıl Pəri 2025” mükafatının qalibləri 28 dekabrda keçiriləcək rəsmi təqdimat mərasimində elan ediləcək.