Özbəkistan nümayəndə heyəti Baku TV-nin qonağı olub

Özbəkistan Milli Teleradio Kompaniyası sədrinin müavini cənab Mamadamin Safarovun rəhbərlik etdiyi nümayəndə heyəti Baku TV-nin qonağı olub.

Heyətin tərkibinə “Özbəkistan 24” telekanalının baş rejissoru Davron Pulatov, ali kateqoriyalı televiziya operatoru Eldor Rustamov, beynəlxalq xəbərlər şöbəsinin redaktoru Madinabonu Xamrayeva, “Özbəkistan MTRK” Teleradio Mərkəzinin baş mütəxəssisi Jasur Maxmudov və Daşkənd Media Mərkəzinin 1-ci kateqoriyalı mütəxəssisi Uluğjon Safarov daxildir.

Görüş zamanı Baku TV-nin direktoru Ramin Cəfərov qonaqlara kanalın fəaliyyəti, müasir yayım texnologiyaları və beynəlxalq media şəbəkəsi haqqında ətraflı məlumat verib. Kanalın “Rəqəmsal Media Məktəbi” layihəsinin əhəmiyyətini qeyd edərək onun məzunlarının Baku TV, o cümlədən müxtəlif media qurumlarında işlə təmin olunduğunu vurğulayıb.

Qonaqlar “Global Media Group”a daxil olan Baku TV-nin iş prosesi ilə yaxından tanış olublar. Tanışlıq zamanı Baku TV-nin beş dildə operativ xəbər istehsal etməsi, ölkənin regionları ilə yanaşı, beş xarici ölkədə müxbir şəbəkəsinə malik olması diqqətə çatdırılıb. Bundan əlavə, kanalın “YouTube” platformasında abunəçi sayının üç milyona çatması və ötən il ərzində yayımlanan videoların bir milyarddan çox baxış toplaması xüsusi qeyd olunub. Vurğulanıb ki, Baku TV-ni yalnız internet üzərindən deyil, həm də kabel və peyk yayımı vasitəsilə Azərbaycanın bütün bölgələrində, eləcə də Avropa və Asiyada izləmək mümkündür.

Baku TV-nin yalnız xəbər istehsalı ilə məhdudlaşmadığı, həm də film və sənədli layihələr hazırladığı da qeyd olunub. Kanalın istehsalı olan “Söz” sənədli filmi beynəlxalq uğurlar qazanıb. Belə ki, ekran əsəri Los-Ancelesdə keçirilən və hər il minlərlə filmin təqdim olunduğu “Accolade Global Film Competition”da mükafat qazanıb. Film həmçinin “Roma Prisma Film Awards” yarışmasının finalçısı olub.

Görüş zamanı Azərbaycan və Özbəkistan media qurumları arasında tərəfdaşlıq imkanları ətraflı müzakirə olunub. Xüsusilə təcrübə mübadiləsi və birgə layihələrin həyata keçirilməsi perspektivləri diqqət mərkəzində olub. Tərəflər gələcək əməkdaşlıq imkanlarını dəyərləndirməyə hazır olduqlarını qeyd ediblər.

Qeyd edək ki, Özbəkistan Milli Teleradiokompaniyası (NTRK) ölkənin dövlət teleradio yayım şəbəkəsidir, 12 TV kanalı, 4 radio kanalı və 12 regional teleradiokompaniyadan ibarətdir. Yayım rəqəmsal, analoq, peyk və internet üzərindən aparılır.