"Anaların balaları ilə öldüyü gündür" | Bərdə terrorunun qurbanlarının xatirəsi anıldı - Baku TV

Bərdə terrorunun altıncı ildönümü ilə əlaqədar anım mərasimi keçirilib.

Terror aktının baş verdiyi ərazidə ucaldılmış xatirə lövhəsinin qarşısında təşkil olunan tədbirdə rayon rəsmiləri, şəhid ailələrinin üzvləri, qazilər, müharibə iştirakçıları və ictimaiyyət nümayəndələri iştirak ediblər.

Anım mərasimində Bərdəyə raket hücumları nəticəsində həlak olanların xatirəsi yad edilib. Hadisənin şahidləri və zərərçəkənlər həmin gün yaşadıqları dəhşətli anları xatırlayıblar.

“Raket hücumu nəticəsində oğlum yaralanmışdı. Onun bədənində 16 qəlpə var idi. Bu gün bizim üçün çox ağır gündür, anaların balaları ilə öldüyü gündür. Biz bu gün yaşayırıqsa, şəhidlərimizin sayəsində yaşayırıq. Onların hər birinə borcluyuq”, – deyə şəhid Məhərrəm Mustafayevin anası bildirib.

Hücum zamanı xəsarət alan Elçin Şirinov isə partlayışın baş verdiyi anı və yaşadığı dəhşəti belə xatırlayıb:

“Qəfildən çox güclü partlayış oldu. Gördüm ki, idarə etdiyim maşın yanır, ayağım zədələnib. Özümü çətinliklə maşından çıxardım. Çox qan itirmişdim. Burada çoxlu yaralılarımız, çox sayda şəhidlərimiz oldu. Allah şəhidlərimizə rəhmət etsin”.

Qeyd edək ki, 2020-ci il oktyabrın 5, 8, 27 və 28-də, eləcə də noyabrın 7-də Bərdə şəhərinin raket və ağır artilleriya atəşinə tutulması nəticəsində ümumilikdə 29 nəfər həlak olub, 112 nəfər yaralanıb. Hücumlar nəticəsində şəhərin mülki infrastrukturuna, nəqliyyat vasitələrinə, yaşayış evlərinə və digər tikililərə külli miqdarda ziyan dəyib.