Avtobus yoluna çıxmağa məcburuq | Bakının mərkəzində piyadalar üçün təhlükə

“28 May” metrostansiyasının yaxınlığında binanın fasadında təmir işləri aparıldığı üçün səkidə dəmir konstruksiyalar quraşdırılıb. Bu da vətəndaşların rahat hərəkətinə maneə yaradır.

Ərazidən keçənlər məcbur qalaraq avtobus zolağı ilə hərəkət etməli olurlar. Bu isə onların həyatını riskə atır.

Araşdırmamızdan məlum oldu ki, ərazidəki təmir işləri Bakı Abadlıq Xidməti tərəfindən həyata keçirilir.

Qurumun problemlə bağlı açıqlaması isə belə oldu: “Adıkeçən binada qəzalı vəziyyət yaranmışdı. Bunun da nəticəsində bina sakinlərinin başına daşlar tökülürdü. Belə təhlükəli vəziyyətin qarşısını almaq, sakinlərin təhlükəsizliyini təmin etmək üçün burada təmir işləri aparmaq olduqca vacibdir. Eyni zamanda səki olduqca dardır, ona görə də yol hərəkətində müvəqqəti çətinliklər yaranıb, bina sakinləri müvəqqəti olaraq yolu park tərəfdən salsalar, heç bir narazılıq olmayacaq.

Burada bina sakinlərinin xeyrinə təxirəsalınmaz işlər aparılır. Yaranmış müvəqqəti narazılıq tezliklə bina sakinlərinin rahatlığı naminə öz həllini tapacaq. Bakı şəhərinin abadlaşdırılması və zəruri təmir-bərpa işlərinin həyata keçirilməsi üçün tərəfimizdən işlər aparılmaqdadır”.