Avtomobillərlə bağlı gözlənilməz qadağa | "Həm təhlükəlidir, həm də..." - Baku TV

2012-ci ildə “Tesla”nın maşın bazarına gətirdiyi yenilik – avtomobillərin qapı dəstəklərinin içəridən açılması tezliklə dəb halını aldı. Bu yenilik Çində təkrarlanaraq həmin bazarda geniş şəkildə istifadə edilməyə başlandı.

Lakin indi Çin bu tətbiqə qadağa qoyur. Bunun səbəbi nədir?

Avtobloger Araz Mübarizoğlunun sözlərinə görə, bu yeniliyin müsbət tərəfi gizli tutacaqların avtomobillərə aerodinamik üstünlük verməsidir. Lakin mənfi tərəfləri daha çoxdur.

O, qeyd edib ki, Çin avtomobilləri daha çox Rusiyaya ixrac olunur və soyuq hava şəraitində bu cür gizli tutacaqların açılması problemlər yarada bilər.

Araz Mübarizoğlu əlavə edib ki, bu müxanizm yalnız görkəm üçündür, amma həm təhlükəli, həm də bahalıdır:

“Yanğın zamanı bu qapıları açmaq mümkün olmur, çünki sistem maşını bloklayır, bu da insanların avtomobildən çıxmasını və xilas olunmasını çətinləşdirir”.

Qeyd edək ki, qayda qüvvəyə mindikdən sonra yalnız istehsal mərhələsində olan modellərə 2029-cu ilə qədər möhlət veriləcək. Elektron mexanizmlə idarə olunan, qapının içərisinə sıxılmış zərif tutacaqlar artıq sertifikat almayacaq.

Mütəxəssislərin fikrincə, avtomobillərin mexaniki dəstəklərlə açılması həm istehsalçılar, həm də vətəndaşlar üçün sərfəlidir. Çünki bu dəstəklər həm ucuz başa gəlir, həm də təhlükəsizdir.