AZAL-ın donanmasına əlavə olunan yeni "Airbus A320neo" təyyarəsinin hansı özəllikləri var? - Baku TV

“Azərbaycan Hava Yolları” (AZAL) donanmasını daha bir yeni nəsil “Airbus A320neo” təyyarəsi ilə genişləndirib.

Bununla da şirkətin donanmasında bu modeldən olan təyyarələrin sayı 4-ə çatıb. Yeni hava gəmisi sərnişinlər üçün daha rahat uçuş imkanları təqdim edir.

“Airbus A320neo” təyyarəsində geniş salon, rahat oturacaqlar, böyük bölmələr, müasir əyləncə sistemi, yüksəksürətli “Wi-Fi” və biznes sinif üçün fərdi monitorlar mövcuddur. Təyyarə yeni nəsil mühərriklərlə təchiz olunduğundan daha az yanacaq sərf edir və karbon emissiyalarını azaldır. Həmçinin 6300 kilometr məsafəyə uçuş həyata keçirə bilir.

AZAL üçün yeni təyyarənin əlavə olunması xidmət keyfiyyətinin yüksəldilməsi, əməliyyat səmərəliliyinin artırılması və ətraf mühitə təsirin minimuma endirilməsi baxımından mühüm addımdır. Hazırda AZAL-ın donanması 28 təyyarədən ibarətdir. Şirkət 2032-ci ilədək bu sayı 50-yə çatdırmağı hədəfləyir.