Əliyar Əliyev küçəsinin sakinləri acınacaqlı vəziyyətdən təngə gəliblər

Bakının Nərimanov rayonunda, Əliyar Əliyev küçəsində uzunluğu 410 metr olan tunelin inşası davam edir. Tikinti işləri ilə əlaqədar küçədə avtobusların hərəkətinin məhdudlaşdırıldığı bildirilir.

Sakinlərin sözlərinə görə, artıq iki ildir ki, Əliyar Əliyev küçəsindən heç bir avtobus marşrutu fəaliyyət göstərmir.

Onlar əvvəllər 24 nömrəli marşrut avtobusundan istifadə etdiklərini, 17 nömrəli avtobus xəttinin də yaxın ərazilərdən keçdiyini bildirirlər.

Hazırda küçədə avtomobillərin hərəkəti mümkündür. Yolun bəzi hissələrinin yararsız vəziyyətdə olmasına baxmayaraq, bu nəqliyyat vasitələrinin gediş-gəlişinə ciddi məhdudiyyət tətbiq olunmayıb.

Başqa bir narazılıq isə avtobus dayanacağının fəaliyyət göstərməməsi ilə bağlıdır. Sakinlərin sözlərinə görə, dayanacaqdan avtobuslar istifadə etmədiyi üçün bəzi avtomobillər burada park edilir. Lakin həmin nəqliyyat vasitələrinin sürücüləri Azərbaycan Yerüstü Nəqliyyat Agentliyinin əməkdaşları tərəfindən cərimələnir.