Məhsulu geri qaytarmaq istədi, amma… | Mağazadan müştəriyə qarşı gözlənilməz addım - Baku TV

Sosial şəbəkələrdə fəaliyyət göstərən “Smart Saat” adlı onlayn mağazadan planşet alan vətəndaş aldığı məhsulun sifariş etdiyindən fərqli olduğunu bildirir.

Şikayətçinin sözlərinə görə, o, 29 noyabr tarixində mağazanın “Instagram” səhifəsində planşet gördükdən sonra satıcı ilə əlaqə saxlayıb və bir terabaytlıq məhsulun olub-olmaması ilə maraqlanıb. Satıcıdan müsbət cavab aldıqdan sonra həmin gün sifariş rəsmiləşdirilib.

Lakin vətəndaş bildirir ki, planşeti istifadə edərkən məhsulun texniki göstəricilərinin uyğun olmadığını aşkar edib:

“Qeydiyyat zamanı hiss etdim ki, problem var. Sonra baxdım ki, məhsul 512 GB-dır. Mən isə bir terabaytlıq istəmişdim”.

Şikayətçi qeyd edir ki, məhsuldan narazı qaldığını mağazaya dəfələrlə bildirib və planşeti geri qaytarmaq istəyib. Onun sözlərinə görə, mağaza əməkdaşları bunu qəbul etməyib:

“Heç olmasa, qiymətini aşağı salın” dedim. Dedilər ki, açılmış məhsul geri qaytarılmır”.

Vətəndaş iddia edir ki, planşeti mağazaya apararaq qaytarmaq istədikdə isə daha sərt münasibətlə üzləşib:

“Bizə dedilər ki, planşeti qoyub getsəniz, çölə atacağıq. Ona görə də mağazaya daxil olduğum andan çıxana qədər hər şeyi videoya çəkdim”.

Onun iddiasına görə, daha sonra məhsul mağazanın qarşısında ağacın dibinə qoyulub və bu barədə ona foto göndərilib:

“Planşeti ağacın dibinə qoyub şəklini çəkib göndəriblər ki, gəlin, məhsulunuzu götürün”.

“Smart Saat” onlayn mağazasının əməkdaşı isə əvvəlcə məhsulun çölə qoyulması ilə bağlı iddiaları təkzib edib. Lakin bir qədər sonra verdiyi açıqlamada planşetin mağazadan çıxarılaraq çölə qoyulduğunu etiraf edib.

Məsələ ilə bağlı Azad İstehlakçılar Birliyinin sədri Eyyub Hüseynov bildirib ki, onlayn ticarətdə bu cür hallara tez-tez rast gəlinir:

“Onlayn platformalarda cəlbedici reklamlar edilir, lakin məhsullar reklamlara uyğun olmur. İstehlakçı pulu ödəyir, lakin mal gələndə onu qaytarmaq və ya dəyişmək problemə çevrilir”.

Ekspert vurğulayıb ki, qanunvericiliyə əsasən, istehlakçı onlayn ticarətdə də hüquqlara malikdir:

“İstehlakçıların hüquqlarının müdafiəsi haqqında” qanuna görə, istehlakçı tələbatını ödəməyən məhsulu 14 gün müddətində dəyişmək və ya geri qaytarmaq hüququna malikdir”.