"Burada olan mənəm, kəsilmiş olsa..." | Bakıxanovdakı parkda nə baş verir? - Baku TV

Sosial şəbəkələrdə Sabunçu rayonu, Bakıxanov qəsəbəsi, Əlyar Əliyev küçəsində yerləşən park ərazisində ağacların kəsilərək yerində obyekt tikilməsi ilə bağlı görüntülər yayılıb.

Baku TV-nin əməkdaşları məsələni araşdırmaq üçün hadisə yerində olub və iddiaların həqiqəti əks etdirmədiyi müəyyən edilib. Məlumata görə, ərazidə aparılan işlər zamanı ağaclara ziyan vurulmayıb və onların hamısı aidiyyəti qurumlar tərəfindən qeydiyyata alınaraq nömrələnib.

İş icraçısı Füzuli Ağayevin sözlərinə görə, tikili uzun illərdir mövcuddur və hazırda burada yalnız təmir-bərpa və xarici görünüşün yenilənməsi işləri aparılır:

“Bu obyekt 10 ildən artıqdır fəaliyyət göstərir. Ərazi həmişə ağacların içində olub. Hazırda yalnız gözəlləşdirmə işləri görülür, yeni tikinti aparılmır. Köhnə sütunların üzlənməsi həyata keçirilir. Ağaclar yerindədir, Ekologiya Nazirliyinin nümayəndələri tərəfindən yoxlanılıb və nömrələnib. Onlara mütəmadi qulluq edilir”.

O həmçinin bildirib ki, obyektin bütün sənədləri qaydasındadır və tikiliyə dair müvafiq çıxarış mövcuddur.