"Dedilər ki, ərin sənin nəyini alıb?!" - "Məni görüb qulaqlarını çəkirlər" | ARZUNUN VAXTI

“Arzunun vaxtı” verilişinin növbəti buraxılışında aparıcı və müəllif Arzu Kəlbi Şükür Əliyev və Aysun Əliyeva cütlüyünün evində olub.

Fiziki qüsurlu olduğu üçün valideynlərinin onu tərk etdiyini söyləyən Aysun bu səbəbdən nənəsinin himayəsində böyüdüyünü bildirib:

“Anam və atam doğulduğum gündən ölməyimi istəyirdilər. Buna görə məni nənəm böyüdüb”.

Aysun iş həyatında üzləşdiyi çətinliklərə də toxunaraq bildirib ki, xarici görünüşünə görə dəfələrlə çalışdığı yerlərdən qovulub.

Onun sözlərinə görə, bununla bağlı sosial şəbəkələrdə də tez-tez qınanır və qəlbini qıran sözlərlə qarşılaşır:

“Mənə “yoldaşın niyə səninlə evlənib?!”, “Ərinə yaraşmırsan, kaş mənimlə tanış olardı” kimi rəylər yazırlar”.

Şükür Əliyev isə həyat yoldaşına göstərdiyi dəstəkdən danışıb:

“Bəziləri “cavan adamsan, niyə işləmirsən?!” deyir, amma gerçəkləri bilmirlər. Aysun uşağa baxmaqda çətinlik çəkdiyi üçün aylarla övladımızı özüm saxlamışam. Bu səbəbdən çalışa bilmirəm. Evdə ona hər işdə kömək edirəm”.