"Dizə kimi palçığın içində..." - Məktəb yolunu kimlər bərbad vəziyyətə salıb? - Baku TV

Masazır qəsəbəsində Laçın rayon Ağoğlan kənd tam orta məktəbinin yerləşdiyi küçənin sakinləri yol problemindən əziyyət çəkirlər.

Onlar narazılıqlarını Baku TV ilə bölüşüblər.

“Əvvəllər bu yolu düzəltmişdilər. Sonradan burada su xətti çəkildiyi üçün yol bərbad hala düşdü. Yolun üstünü örtdülər, amma yenidən dağıldı”, – sakinlərdən biri söyləyib.

Digər bir vətəndaş isə qeyd edib:

“Yol bərbad haldadır. Havalar soyuq olanda uşaqlar çox əziyyət çəkirlər. Dizə kimi palçıq içində gəlirlər”.

Məsələ ilə bağlı Masazır kənd bələdiyyəsindən bildirilib ki, yerli özünüidarəetmə orqanlarının büdcələri sakinlər tərəfindən verilən vergilər əsasında formalaşdığından yeni salınan küçələrin asfaltlanmasında müəyyən yubanmalar müşahidə edilir.

Buna baxmayaraq, Almas İdırım küçəsinin də əsaslı şəkildə abadlaşdırılması qurumun cari il üçün tədbirlər planına daxil edilib və il ərzində bu işlərin həyata keçirilməsi nəzərdə tutulub.