"Qurumlar hara baxır, işləri nədən ibarətdir?" | Xətaidə küçə hələ də təmir edilməyib - Baku TV
Bakının Sədi Musayev küçəsində yolun bərbad vəziyyətdə olması sakinlərin narazılığına səbəb olub.
Məlumata görə, təxminən bir ay əvvəl ərazidəki su borusunun üzərində yerləşən evin bir hissəsində çökmə baş verib. Hadisədən sonra ərazidə təmir-bərpa işləri aparılsa da, yolun asfalt qatı bərpa olunmayıb.
Sakinlər bildirirlər ki, bu vəziyyət həm piyadaların, həm də sürücülərin hərəkətini iflic edib. Xüsusilə yağışlı havalarda çuxurların su ilə dolması və yolun palçıqlı olması vəziyyəti daha da ağırlaşdırır.
“Buradan keçmək olmur. Çuxur böyük olduğu üçün maşının altı dəyir”, – sürücülərdən biri söyləyib.
Digər bir vətəndaş isə qeyd edib: “Heç rayonlarda belə yol yoxdur. Yolu qazıb gediblər, bərbad haldadır. Belə olmaz axı”.
Məsələ ilə bağlı Azərbaycan Dövlət Su Ehtiyatları Agentliyindən bildirilib ki, hazırda İri Şəhərlərin Birləşmiş Su Təchizatı Xidməti tərəfindən həmin ərazidə 280 millimetr diametrli yeni su xəttinin inşası həyata keçirilir.
Qurumun rəsmi açıqlamasına görə, hazırda xəttin çəkildiyi hissələrə müvəqqəti olaraq karbonat materialı olan daşlar döşənib. Layihənin icrası tam başa çatdıqdan sonra ərazidə asfalt örtüyünün bərpası təmin ediləcək.
