ABŞ İsrail və Qətəri barışdırmaq istəyir

ABŞ Prezidentinin xüsusi elçisi Stiv Uitkoff iki ölkə arasında münasibətlərin normallaşdırılması üçün İsrail və Qətər nümayəndələri arasında Nyu-Yorkda gizli görüş keçirəcək.

Bu barədə “Axios” iki mənbəyə istinadən məlumat yayıb.

Qeyd olunub ki, görüşdə İsraili “Mossad”ın rəhbəri David Barnea, Qətəri isə yüksəkrütbəli bir məmur təmsil edəcək.

Nəşr vurğulayıb ki, Nyu-Yorkda keçiriləcək görüşdə, çox güman ki, Qəzza zolağındakı vəziyyət və Fələstinin radikal HƏMAS hərəkatının tərk-silah edilməsi müzakirə olunacaq.

Xatırladaq ki, İsrailin sentyabrın 9-da Dohada HƏMAS-ın yüksəkrütbəli liderlərini vurmasından sonra ABŞ-nin Yaxın Şərqdəki iki əsas tərəfdaşı arasında münasibətlər əhəmiyyətli dərəcədə pisləşib. Fələstin hərəkatı 6 nəfərin, o cümlədən təşkilatın Qəzza zolağındakı liderlərindən birinin oğlu Xəlil əl-Heyinin və Qətər təhlükəsizlik zabitinin öldüyünü bildirib.