İranda “Qüds günü” yürüşü | Xarici işlər nazirindən sensasiyalı açıqlamalar - Baku TV

ABŞ və İsrailin hücumlarının davam etdiyi bir vaxtda İranın bir neçə şəhərində Dünya Qüds Günü münasibətilə yürüş keçirilib.

Yürüşlərdə insanlar Fələstinə dəstək, ABŞ və İsrailə isə etiraz mesajları veriblər.

Əl-Əqsa məscidi və Fələstinə dəstək ifadə edən plakatlar, eləcə də Fələstin bayraqlarının qaldırıldığı yürüşdə İsrail, ABŞ və Böyük Britaniya əleyhinə şüarlar səsləndirilib.

Aksiyada iştirak edən İranın xarici işlər naziri Abbas Əraqçi jurnalistlərə açıqlama verib.

“Neft qiymətləri hazırda çox yüksəlib. Bölgədə ABŞ və İsrailin siyasətləri nəzərə alındıqda qiymətlərin gələcəkdə də artmağa davam etməsi ehtimalı yüksək görünür. Bunun məsuliyyəti bölgəni fəlakətə sürükləyənlərin üzərindədir, bunun hesabını həmin ölkələr verməlidir. İsrail və ABŞ-nin hücumlarına baxmayaraq, milyonlarla insanımız küçələrdədir. Onlar yalnız Tehranda deyil, bütün şəhərlərdə İslam Respublikası, Qüds, Fələstin və illərdir müdafiə etdiyimiz bütün ideallara dəstək məsələsində qətiyyətini göstərdi. İnşallah, bu güc və qətiyyətlə davam edəcəyik və düşmənlərimiz İran xalqının gücünü qəbul etməyə məcbur qalacaqlar”, – deyə o bildirib.

Paytaxtdakı yürüşdə Tehran sakinləri ilə yanaşı, İranın Ali Milli Təhlükəsizlik Şurasının katibi Əli Laricani, Məhkəmə Hakimiyyətinin rəhbəri Qulam Hüseyn Möhsini, nazirlər, yüksəkrütbəli hərbi və siyasi rəsmilər iştirak ediblər.

Hətta onları ABŞ və İsrail tərəfi də tək qoymayıb. Belə ki, yürüş zamanı ABŞ-İsrailin hava hücumu nəticəsində bir qadın Tehran mitinqinin yaxınlığında qəlpələrdən ölüb.