Gürcüstan öz niyyətlərini aydınlaşdırmalıdır | Aİ-dən baş verən proseslərə reaksiya

Gürcüstanın Avropa İttifaqına daxil olması prosesi de-fakto dayanıb.

Bu barədə Aİ liderlərinin Brüsseldə keçirilən sammitinin yekunlarına dair bəyanatında deyilib. Avropa İttifaqı Gürcüstanda baş verən son hadisələrlə bağlı ciddi narahatlığını da ifadə edib.

Eyni zamanda qəbul edilmiş “Xarici təsirin şəffaflığı haqqında” qanun Avropa Komissiyasının Aİ üzvlüyünə namizəd statusunun əldə edilməsi ilə bağlı tövsiyələrində göstərilən addımlardan yayınma adlandırılıb.

“Avropa İttifaqı Gürcüstan hakimiyyətini hazırkı fəaliyyət kursunu dəyişdirərək öz niyyətlərini aydınlaşdırmağa çağırır ki, bu da Gürcüstanın təşkilata yolunu təhlükə altına alır və faktiki olaraq üzvlük prosesinin dayanmasına gətirib çıxarır”, – deyə bəyanatda qeyd olunub.

Həmçinin bildirilib ki, Gürcüstanda vətəndaş cəmiyyəti nümayəndələrinə, siyasi liderlərə, ictimai fəallara və jurnalistlərə qarşı təhdid və hücum hallarının sayı artır.