Haitidəki iğtişaşlar ən yüksək həddə çatdı

Almaniyanın Haitidəki səfiri ölkəni tərk edərək qonşu Dominikan Respublikasına yollanıb.

Bu barədə Almaniya Xarici İşlər Nazirliyindən xəbər verilib. Bildirilib ki, almaniyalı diplomatla birlikdə Avropa İttifaqının nümayəndə heyətinin üzvləri də qonşu ölkəyə səfər ediblər.

“Onlar hələlik oradan işləyəcəklər”, – deyə nazirliyin məlumatında qeyd edilib.

Bir müddət əvvəl isə ABŞ Haitidəki səfirliyinin əməkdaşlarını təxliyə edib.

Qeyd edək ki, son günlər Haitidə silahlı dəstələr tərəfindən polis məntəqələrinə, həbsxanalara və məhkəmə binalarına silsilə hücumlar baş verib.

Kütləvi informasiya vasitələrinin məlumatına görə, hazırda dəstələr Haitidə paytaxtın 80 faizinə, eləcə də ölkənin qalan hissəsində nəqliyyat əlaqələrinə nəzarət edirlər. Haitidəki hər iki beynəlxalq hava limanı qarşıdurmaların baş verməsi səbəbindən bağlanıb. Ölkədə fövqəladə vəziyyət və komendant saatı tətbiq edilib.