II Ramzesin heykəlinə aid 1,6 metrlik baş hissəsi aşkarlanıb

Misirin Bəhbeyt-əl-Həcər kəndində firon II Ramzesin heykəlinə məxsus 1,6 metr hündürlüyündə baş hissə tapılıb.

Bu barədə Misirin Turizm və Qədim Əsərlər Nazirliyi məlumat yayıb.

Arxeoloji qazıntı işləri yerli sakinin müraciətindən sonra fəaliyyətə başlayıb. Həmin şəxs öz evinin qarşısındakı ərazidə üzərində qədim yazılar olan daşın olduğunu aidiyyəti orqanlara bildirib.

Tapıntıda firon Yuxarı və Aşağı Misiri təcəssüm etdirən qoşa tacla təsvir olunub. Heykəlin arxa dayağının qorunub saxlanılan hissəsində hökmdarın adı həkk edilib.

Mütəxəssislərin fikrincə, başın ölçülərinə əsasən bu heykəlin altlıqla birlikdə ümumi hündürlüyü təxminən 8,5 metr olmalıdır. Ərazidə ayaqları və altlığı olmayan daha bir hökmdar heykəli də tapılıb. Bu heykəlin də II Ramzesə aid olması ehtimal edilsə də, hələlik bu rəsmi təsdiqlənməyib.